國王的新衣（下）
上集：https://bit.ly/3g3dw27
國王嗰邊就好順利，佢遇到仙風道骨嘅秦先生。
雲霧崖上，秦先生不斷同人講，「驗證智慧」呢件事真係靠唔住，叫大家唔好跳落去，白白送命。
秦先生都成功勸咗一部份人離開，但都有人唔聽佢講，堅持跳落去。
每當秦先生見到有人跳落去，神情都會有啲自責。
國王明白，秦先生就係心懷天下嘅聰明人。
等到跳崖日結束，國王表明身份，秦先生初時好嬲，以為國王害死咗咁多人。
國王帶佢去崖下一睇，秦先生先消氣，國王就禮聘佢做丞相。
除咗秦先生之外，仲有其他人勸大家唔好跳崖，只係冇秦先生咁盡心盡力，國王就請晒佢哋嚟，成為唔同部門嘅主管。
諗出呢個計劃嘅我，當然被國王大讚，封為教育部主管。
國王好開心，成個朝廷都係聰明人，國家一定會愈嚟愈好。
我都係咁諗，但我漸漸發現，教育部主管唔易做。
我只係咁啱諗到個選拔人才嘅方法，我對教育一竅不通，連國家嘅教育制度係點都未搞清楚。
但每日返工，總有大量嘅事要我決定，搞到我頭都痕埋，生怕做錯一個決定，就害咗啲學生。
我開始諗，我唔識做教育，其他「聰明人」會唔會……都唔識做佢哋嘅工作？
果然，秦先生做咗丞相後，日日廢寢忘餐，但接連幾條政令都出咗大問題，搞到佢焦頭爛額。
雖然國王好信任佢，但佢都好自責。
而其他部門嘅「聰明人」，都有類似嘅情況，成個政府愈嚟愈混亂。
十年後，鄰國乘虛而入，到我哋發現嗰陣，鄰國嘅兵馬已經入到王宮。
軍事部主管嚎啕大哭，佢話佢都唔知會咁，佢上任前，係一個詩人，從來冇做過軍事相關嘅嘢，更加唔好講收集情報。
「我以為任用聰明人就可以救國，唔通佢哋都唔夠聰明？」國王問我。
我無言以對。
所有人都以為，即將亡國。
千鈞一髮間，一隊兵馬出現，佢哋武功高強，以一當十，趕走咗敵兵。
我望一望兵馬嘅領頭人，點解咁熟口面？佢咪係……大牛，第一個跳落雲霧崖嘅大牛。
國王好感激大牛，設宴擺待，大牛講出佢呢十年嘅經歷。
原來，佢跳完雲霧崖，意識到自己唔係聰明人，亦冇可能成為聰明人。
於是佢帶住一班兄弟，苦練武功，佢哋本來就有武功底子，再學埋排兵佈陣，漸漸發展成一隊精兵。
「你點解識練兵嘅？」國王言下之意，係大牛咁蠢，點會識練兵。
「我唔識㗎。」大牛撓撓頭：「街邊咪有《孫子兵法》賣，我哋一人一本，日睇夜睇，交流心得，再分隊模擬……慢慢就變成咁。」
我同國王對視一眼，恍然大悟。
一直以嚟，國王都搵緊一個「聰明人」，希望聰明人可以解決所有問題。
但術業有專攻，聰明比唔上專業，冇專業嘅聰明，都只係空中樓閣，即使偶有妙計，都難以長久。
正如你病咗，一個聰明人唔會識醫你，一個受過十年專業訓練嘅醫生，哪怕佢本質唔係咁聰明，都可能醫得好你。
秦先生辭去丞相之位，其他「聰明人」（包括我在內）都辭晒職。
國王重新選拔人才，唔再用啲古靈精怪嘅方法，而係正正經經建學校、辦教育，用考試搵出唔同方面嘅人才。
咁樣未必搵到最出色嘅天才，但至少每個揀出嚟嘅人才，都可以基本勝任工作。
我雖然做番一個裁縫，唔再位高權重，但我相信，我哋嘅國家一定會愈嚟愈好。
人人都想做天才，但世上邊有咁多天才，天才亦唔可以解決所有問題。
或者我哋無法成為天才，但只要堅持學一樣嘢，總有一日，可以做一個專才。
有時候，專才比天才更有用。
－完－
將專頁設定為「搶先看」/ "See first"，最新故仔馬上睇！
龜兔賽跑之後：https://goo.gl/5wMsvh
尋找靈魂伴侶：http://bit.do/fvNNF
#短故 #短篇 #小說 #陳美濤 #廣東話 #粵語 #tomatochan #國王的新衣
Search